10/9/22

Despedida do blog da BIBLIOSOÑOS

O blog da BIBLIOSOÑOS, que comezou a editarse en setembro de 2009, deixa de ser o blog da nosa biblioteca en setembro de 2022. Durante 14 cursos foi  o blog de referencia tanto da biblioteca coma do colexio, nel quedan recollidas todas as actividades e proxectos levados a cabo.

Seguiremos abertos no blog da nosa páxina web 

CEIP de Celeiro (Viveiro LUGO)




24/6/22

ACTIVIDADES DE FIN DE CURSO

  O pasado mércores, 15 de xuño, o alumnado de Infantil foi de excursión ao Monte San Roque, invitados pola ANPA, onde realizaron  distintas actividades: visita aos animais, paseo e contacontos cun “trasgo”, xogamos  nos hinchables e puidemos  tirarnos nas tirolinas. Pasámolo xenial! Neste video podedes ver algúns destes momentos. Moitas grazas a ANPA por organizar esta xornada.

 


O martes, 21 de xuño, todo o alumnado de Primaria tamén acudiu ao monte San Roque para disfrutar das actividades programadas por Roqsport. Foi unha actividade promovida pola ANPA do colexio.


O último día do curso fixémoslle unha pequena homenaxe ao "Resu": vestíndonos coas roupas propias para asistir a este evento, realizamos murais que logo pegamos no pavillón que van utilizar persoal da organización, bailamos, cantamos e  ...

tamén tivemos un momento moi especial para despedir a varios profesores que estiveron este curso no colexio e especialmente á mestra Angélica que se xubila despois de levar moitísimos anos no cole de Celeiro. 

PREME NA IMAXE PARA VER O VÍDEO



13/6/22

XORNADA MEDIOAMBIENTAL


Esta iniciativa,  financiada pola Xunta de Galicia e o FEMP (Fondo Europeo Marítimo e da Pesca),  nace  froito do convenio de colaboración entre o CEIP de Celeiro e Porto de Celeiro S.A OPP-77 para promover actividades que contribúan a concienciar ao alumnado de Celeiro sobre o medio ambiente mariño, e o coñecemento da realidade económica e social da súa contorna e dos produtos de pesca.

 A xornada dividiuse en 4 ambientes diferentes:

  • a primeira hora, todo o alumnado decorou a súa capa de superheroe e superheroína, con ela convertíronse en especialistas no coidado do Medio Ambiente
  • unha xincana de recolecta de lixo, 
  • proxección dun documenta relacionado co coidado do noso Planeta
  • un obradoiro didáctico centrado no xogo e na imaxinación, e, como non, relacionado co coidado do Medio Ambiente e a fauna mariña.
O obxectivo é que sexa unha xornada lúdica pero tamén de aprendizaxe sobre o mar e a necesidade de coidar e respectar o medio ambiente.
O alumnado de 5º e 6º de Primaria está convocado a participar nun concurso onde poderán deixar voar a súa imaxinación e creatividade coa presentación dunha manualidade onde deixarán patente o que para elas e eles significa o mar. Valorase de xeito positivo a utilización de materiais de refugallo. Trátase dunha actividade onde quedará plasmada a vea artística destas pequenas e pequenos. O concurso está aberto ata o día 18 de xuño.
MÁIS INFORMACIÓN NA SEGUINTE PRESENTACIÓN
PREMER NA IMAXE

VÍDEO DA XORNADA




11/6/22

Falamos de emocións!

 O alumnado de 6º de Primaria preparou na clase de Educación Emocional o conto "La pelota roja" do libro De mayor quiero ser...FELIZ, de Anna Morató García.

Durante a semana pasaron por todas as aulas de Infantil e de 1º a 4º de Primaria, na Hora de Ler. 


Desfrutaron tanto os ouvintes como os lectores.

Foi unha actividade moi instructiva e divertida!

Tamén lles fixeron participar en varias actividades preparadas por eles mesmos.

No seguinte vídeo podemos ver a intervención na aula de 3º de Primaria.

PREME NA IMAXE


 

9/6/22

VISITA AO HELIPORTO DE CELEIRO

    

Todo o alumnado de Educación Primaria tivo a oportunidade de visitar as instalacións do Heliporto de Celeiro.

O Heliporto Costa Norte é un heliporto situado na localidade de Celeiro, no Concello de Viveiro, nas inmediacións do Porto de Celeiro. Este heliporto foi construído a finais dos anos 80, e unha década despois modernizado e ampliado a unha superficie de 4.000 metros cadrados. Este heliporto é a base do helicóptero "Pesca 2", un dos helicópteros do servizo de Gardacostas de Galicia, dependente da Xunta de Galicia. 
Na visita, dous pilotos e dous rescatadores, explicáronlles como era o seu traballo. Observaron os diferentes aparellos que utilizan para levar a cabo un rescate e tamén desfrutaron da experiencia de meterse dentro dun helicóptero.
 
Esta visita está enmarcada dentro do proxecto "Coñecemos Celeiro".
 
MOITAS GRAZAS  A TODO O PERSOAL DA BASE POR COMPARTIR ESTA EXPERIENCIA CO ALUMNADO DE CELEIRO!
 
 PREMER NAS IMAXES PARA VER OS VÍDEOS DA ACTIVIDADE
 




 

8/6/22

TRABALLOS DO ALUMNADO DE INFANTIL

Dentro do Proxecto "Coñecemos Celeiro", o alumnado de Infantil elaborou un gran mural que recolle a localidade de Celeiro coas localización máis salientables. 

Sinalizaron cada punto e elaboraron unha postal para identificar o lugar. 

Previamente percorreron todos os lugares en varias visitas que realizaron por Celeiro para coñecer de preto o lugar, as instalacións e para o que son necesarias as mesmas. 

O resultado final podemos velo no seguinte vídeo.

 PREMER NAS IMAXES


 Dentro destas visitas estivo a do parque de bombeiros situado tamén en Celeiro.

Na visita explicáronlles como funciona o servizo, poideron ollar e tocar diferentes instrumentos e aparellos. Tamén lles deron un "carnet de bombeiros" e un pequeno casco.

Foi unha visita por instrutiva e pasárono moi ben!


 


XORNADA DE TRABALLO NO COLEXIO

 Na tarde do martes, 7 de xuño, rematamos o proxecto de creación de "PATIOS DINÁMICOS E DIVERTIDOS" e tamén foi o momento do traballo do Voluntariado de ALCOA.

No mes de outubro tivemos unha reunión coa ANPA do colexio e da mesma saíron moitos proxectos de colaboración, entre eles a posibilidade de realizar pintado de xogos nos patios do colexio. 

  • Primeiramente fixemos unha convocatoria de ideas: XOGOS NOS PATIOS DE RECREO
  • Unha vez elixidos os xogos máis populares comezaron coa división dos patios e co pintado dos primeiros xogos.
  • Por último, coa colaboración do voluntariado de ALCOA, pintáronse os últimos xogos.
  • Nesta mesma tarde, tamén o voluntariado de ALCOA fixo as tarefas de mantemento e limpeza da charca e do entorno medioambiental do colexio. Este proxecto foi solicitado pola ANPA, o que lles proporcionou unha gran subvención e donaron ao colexio unha estación meteorolóxica dixital. Gracias a todos os voluntarios!

Aproveitamos para agradecer á directiva da ANPA toda a colaboración prestada para poder realizar moitos proxectos en común.

PREME NA IMAXE PARA VER AS FOTOS DA XORNADA


 


5/6/22

CONCURSO MEDIOAMBIENTAL CONVOCADO POR PORTO CELEIRO

ESCOLARES DE CELEIRO CELEBRARÁN O DÍA MUNDIAL DO MEDIO AMBIENTE COA APERTURA DO CONCURSO DE MANUALIDADES PARA OS ALUMNOS DE 5º E 6º DE PRIMARIA

O alumnado do CEIP Celeiro con idades comprendidas entre os 11 e 12 anos poderán participar, dende este domingo,  día Mundial do Medio Ambiente, no concurso de manualidades sobre a súa visión sobre o mar, terán que plasmar como ven eles esta materia tan valiosa, limpo, sucio, con peixes, sen eles… Esta, será temática protagonista desta xornada, un Día Mundial do Medio Ambiente que este ano leva como lema “unha soa terra”.

O domingo, 5 de xuño, día Mundial do Medio Ambiente, sairon as bases deste concurso na web do Porto de Celeiro (www.puertodeceleiro.es ) e tamén a través da web do CEIP Celeiro (https://www.edu.xunta.gal/centros/ceipceleiro/) e desta maneira arrancará o período de inscrición e recepción de traballos que terá lugar ata o 18 de xuño, Día da Gastronomía  Sostible.Nas bases daranse a coñecer todas as características que teñen que ter os traballos presentados e tamén os premios establecidos, que son: premio á orixinalidade e premios á mellor técnica. As e os gañadores recibirán libros sobre temática ambiental e mariña, e serán entregados o 23 de xuño. Este ano, como novidade, todas as aulas do centro recibirán un agasallo que consistirá nun microscopio dixital de detalle e precisión.

O concurso estará destinado a nenas e nenos de 5º e 6º de primaria. Un concurso onde poderán deixar voar a súa imaxinación e creatividade coa presentación dunha manualidade onde deixarán patente o que para elas e eles significa o mar. Valorase de xeito positivo a utilización de materiais de refugallo. Trátase dunha actividade onde quedará plasmada a vea artística destas pequenas e pequenos.

Pero isto non é todo, dende o Porto de Celeiro, encherán de actividade o centro o día 9 de xuño, xornada posterior ao Día Mundial dos Océanos, con obradoiros e actividades para todo o colexio, dende os 3 aos 12 anos. Unha xornada que dividirá a mañá en 4 ambientes diferentes: a primeira hora, todo o centro decorará a súa capa de superheroe e superheroína, con ela converteranse en especialistas no coidado do Medio Ambiente, a continuación farase unha xincana de recolecta de lixo, tamén haberá a proxección dun documenta relacionado co coidado do noso Planeta, e un obradoiro didáctico centrado no xogo e na imaxinación, e, como non, relacionado co coidado do Medio Ambiente e a fauna mariña. O obxectivo é que sexa unha xornada lúdica pero tamén de aprendizaxe sobre o mar e a necesitade de coidar e respectar o medio ambiente.

Esta iniciativa,  financiada pola Xunta de Galicia e o FEMP (Fondo Europeo Marítimo e da Pesca),  nace  froito do convenio de colaboración entre o CEIP de Celeiro e Porto de Celeiro S.A OPP-77 para promover actividades que contribúan a concienciar ao alumnado de Celeiro sobre o medio ambiente mariño, e o coñecemento da realidade económica e social da súa contorna e dos produtos de pesca.

PREME NA IMAXE PARA VER A PRESENTACIÓN

DAS BASES DO CONCURSO

2/6/22

Camiño do Mar por Celeiro



 Na mañá do martes, 31 de maio, o alumnado de 4º, 5º e 6º de Educación Primaria, tivo a oportunidade de realizar o percorrido do "CAMIÑO DO MAR" pola localidade de Celeiro acompañados de Lucas Requeijo e Noela Feal, responsables deste proxecto.

Comezaron o camiño desde o pavillón polideportivo do colexio pasando polo camiño da Atalaia, Camiño Real, Rúa Grande, praia de Celeiro, Rúa Lavandeiras para chegar ata o Chao de volta ao colexio.



 

29/5/22

SAÍDA DO ALUMNADO DE 1º e 2º CURSO DE EDUCACIÓN PRIMARIA

 O xoves, 26 de maio, o alumnado de 1º e 2º de Educación Primaria fixo unha visita cultural á Fábrica de Cerámica de Sargadelos situada no Concello de Cervo.

Visitaron o Museo e a Fábrica para despois ir ata o Paseo dos Namorados onde viron unha fervenza. Remataron a xornada no parque. 

Foi un día moi completo e pasárono moi ben!

PREME NA IMAXE PARA VER O VÍDEO



27/5/22

Visita da escritora Érica Esmorís

 Na mañá do xoves, 26 de maio,  o alumnado de 5º e 6º de Primaria tivo a oportunidade de coñecer a Érika Esmorís, escritora primiada, ilustradora de grandes marcas, guionista e directora de casting de diversas pezas audiovisuais...

Durante o trimestre, o alumnado comezou a ler libros dela, concretamente "Patio de luces" en castelán e "Quen salva a un can" en galego.

Primeiramente, Érica realizou unha presentación interactiva sobre ambos libros, amosando en imaxes a orixe que tivo cada un deles. Tamén realizou xogos cos que amosou a creatividade coa que os escribiu, así como os valores que foi transmitindo. Posteriormente firmou cada exemplar.

VÍDEO DA ACTIVIDADE


 

26/5/22

SAÍDA DE 6º DE PRIMARIA

 O mércores, 25 de maio, os nenos e nenas se 6º de Primaria visitaron as instalacións situadas no plígono de Cuíña en Cervo, onde coñeceron os conceptos básicos da a acuicultura do rodaballo.

O alumnado viu un pequeno vídeo explicativo da crío deste tipo de peixe plano para despois poder disfrutar das distintas zonas nas que está dividida a fábrica.

Divididos en dous grupos poideron ver como vai crecendo o rodaballo dende que é unha pequena larva ata que cumpre 100 días e sae da fábrica para o seu posterior engorde.

Ademais disto, o alumnado tivo a oportunidade de poder achegarse aos tanques de rodaballo para darlles de comer e utilizar o microscopio no laboratorio.

Foi unha visita moi agradable!    VÍDEO DA SAÍDA



20/5/22

FESTA DO MAIO

 Despois das Letras Galegas, agora toca o turno para a celebración da Festa do Maio.

Na mañá do xoves, 19 de maio, todo o alumnado e profesorado engalanado con sombreiros e colares de flores cantamos e bailamos para festexar o maio.

Tamén realizamos un gran mural alusivo, o resultado da festa podemos velo no seguinte vídeo:



15/5/22

LETRAS GALEGAS 2022

Presentámosvos os nosos traballos sobre o Día das Letras Galegas: 

  • BIOGRAFÍA DO AUTOR  FLORENCIO DELGADO GURRIARÁN, feita por todo o alumnado do centro. 
  • Acompañada da canción: Salve a Bandeira! do libro Cancioneiro da loita galega, cantada polos nenos do noso cole na aula de música.

  • Video 4º E.INFANTIL, "Nós falamos galego"
  • Mural "SEMENTA O GALEGO" de 1º e 2º de Ed. Infantil



  • Decoración das nosas fiestras con palabras fermosas en galego

O alumnado de 6º de Primaria, en RADIO NA BIBLIO, realizou tres podcasts que podemos ver na páxina da RUFOSOÑOS.                    

Premede na imaxe




14/5/22

XORNADA DE CLAUSURA "A VOLTAS COAS PALABRAS"

 

Chegou o día da clausura da Exposición Conxunta da MICRORREDE A MARIÑA:

 "A voltas coas palabras"

Foi unha semana intensa con actividades dinamizadoras moi diversas e moi concurridas polas familias e público en xeral.

Na tarde do venres, 13 de maio, actuaron o Coro do CEIP de Celeiro e o Grupo de Guitarras do Conservatorio de Música de Viveiro.

A mestra de ceremonias foi Karina Parga e o discurso de clausura correu a cargo do coordinador da biblioteca do CEP Lois Tobío, Iván Suárez.

O Coro do colexio, dirixido por Marta Pérez, levou a cabo o programa "A PALABRA FEITA MÚSICA": Contos e poemas musicados.

  • Os fabóns máxicos (conto de Hans Christian Andersen)
  • O Xigante Seisdedos (conto popular)
  • O frautista de Hamelin (conto dos irmáns Grimm)
  • Esta non é outra historia de piratas (baseado no conto de María Rolle con música de Marta Pérez)
  • Paseniño, paseniño (poema de Rosalía de Castro e música de Marta Pérez)
  • Salve, Bandeira! (poema de Florencio Delgado Gurriarán e música de Marta Pérez)

Felicitamos a todas as nenas e nenos que participaron no coro pois fixérono moi ben. Despois do traballo realizado nos ensaios recibiron moitos aplausos e moi merecidos. NORABOA A TOD@S!

Despois do discurso de clausura do profesor Iván Suárez actuou o Grupo de Guitarras do Conservatorio de Música de Viveiro a quen lle agradecemos a súa colaboración co coro do colexio. Tamén participaron no coro os profesores Mada Álvarez e Ricardo González, moitas gracias!.

Foi unha xornada moi intensa e que deixa moi bos recordos. 


13/5/22

ENTREVISTA A ANGEL PIÑEIRO

Programa de Radio na Biblio realizado por Laura, Johana, Ana, Amalia, David e Thaïs. 

Entrevista a Ángel Piñeiro, unha das persoas encargadas da produción no Resurrection Fest

Queremos agradecerlle a súa visita e a posibilidade de coñecer un pouco máis sobre este festival de música que se celebra no noso pobo e que acerca a máis de 100.000 persoas de diferentes partes do mundo a Viveiro e Celeiro. 

A importancia do Resurrection para un pobo tan pequeno é moi relevante tanto social como economicamente por eso queremos saber moito máis sobre el.


 

12/5/22

3ªXORNADA: IES MARÍA SARMIENTO

Na tarde do mércores, 11 de maio, a Exposición "A VOLTAS COAS PALABRAS" volveu abrir e foron moitos os que se achegaron para ver os traballos realizados.

 

O alumnado do IES MARÍA SARMIENTO presentu o "DÍARIO DO SARMIENTO", a radio contra o acoso escolar e que forma parte do Proxecto AMIGO. A súa idea é por a andar unha radio na que todas as persoas que necesiten axuda podan contar con eles.



PREME NA IMAXE PARA VER O VÍDEO



11/5/22

SAÍDA DO ALUMNADO DE 5º E 6º CURSO DE PRIMARIA

 O martes, 10 de maio, os nenos e nenas  de 5º e 6º curso de Primaria viaxaron a LUGO para pasar un gran día cheo de actividades.

Pola mañá visitaron Rocolugo, un rocódromo onde dar os primeiros pasos en escalada e desfrutar de novas sensacións.

Despois xantaron nun parque preto do río Miño, para despois ir ata o centro de Lugo comer un xeado e visitar a praza maior.

Pola tarde, percorreron toda a Muralla Romana e visitaron O Vello Cárcere nunha visita guiada onde lles explicaron o uso do edificio e a súa arquitectura.

No seguinte vídeo tedes unha mostra gráfica do día. 

PREMER NA IMAXE



2ª XORNADA DA EXPOSICIÓN "A VOLTAS COAS PALABRAS"

O martes, 10 de maio, foi a quenda da BIBLIOCOVAS dentro da Actividade Dinamizadora da Exposición "A voltas coas palabras" da Microrrede Plambe da Mariña.

Os nenos e nenas de 1º de Educación Primaria representaron "Non é unha caixa" , unha historia que nos amosa que o xoguete máis importante é a imaxinación.

Fixérono xenial!!!!!!

Aquí vos deixamos o vídeo para que o disfrutedes....


 

10/5/22

INAUGURACIÓN "A VOLTAS COAS PALABRAS"

 Na tarde do luns, 9 de maio, realizamos o acto inaugural da Esposición Conxunta "A Voltas coas Palabras".

Representantes dos centros educativos participantes, inspectores de educación, autoridades (alcaldesa, María Loureiro e Xefa Territorial de Educación, Mariña Gueimunde), a nosa asesora das bibliotecas (Chelo Guntín) e facendo a función de Mestra de Ceremonias Karina Parga; con gran ledicia pola volta á normalidade demos por inaugurada a  convocatoria número 11 da MICRORREDE PLAMBE A MARIÑA.

Nesta primeira xornada contamos co  xornalista, escritor e contador de historias, Pablo J. Rañales, quen fixo unha significativa reflexión sobre as palabras.
Tivemos tamén a ctuación musical de Amigos do folk, grupo de gaitas do Conservatorio
Profesional de Música de Viveiro.

No seguinte vídeo podemos ver un resumo do acto.



7/5/22

MONTAXE DA EXPOSICIÓN venres 6 maio

 Na tarde do venres, 6 de maio, as compoñentes e compoñente da MICRORREDE A MARIÑA fixemos a montaxe da Exposición Conxunta. Este ano foi máis sinxela que en cursos anteriores, pois toda a información dos traballos realizados están nos códigos Qr que leva cada cadro.

Son un total de 14 traballos moi orixinais e realizados con diferentes técnicas.

Convidávosmos a visitar a exposición:



4/5/22

PROXECTO DA MICRORREDE A MARIÑA

 A MICRORREDE PLAMBE A MARIÑA é un Proxecto Colaborarivo das Bibliotecas Escolares da Mariña que pretende buscar fórmulas para dinamizar as comunidades educativas a través da literatura coa ansia de darlle un novo sentido ao hábito lector do alumnado. Esa inquietude por facer un traballo colaborativo xurdiu no ano 2011 despois dos Encontros PLAMBE (Plan de Mellora das Bibliotecas Escolares). 

Daquela a maior parte dos centros escolares da Mariña Occidental xa formabamos parte deste programa e aí xermolou a idea de formar unha estrutura de traballo asociativo, co fin de intercambiar experiencias de fomento da lectura e da cultura en xeral... Como? Levando a cabo un proxecto anual común que incidise sobre as comunidades educativas e fomentase a implicación das familias no hábito lector.

Desde entón, ano tras ano, a Microrrede non fixo máis que medrar: sacando para diante once proxectos consecutivos (incluíndo  o ano 2020#QuedaNaCasa e o ano 2021 que foi de xeito virtual, a través do blog MICRORREDE A MARIÑA)

Este ano 2022 o proxecto que presentamos é: A VOLTAS COAS PALABRAS

A temática vennos dada polo lema que escolle a Asesoría das Bibliotecas Escolares de Galicia para este curso: A Biblioteca Escolar ten a palabra.

Presentamos o cartel que foi realizado por Izan Fra Fernández, alumno de 2º de BACHARELATO de Artes no IES Monte Castelo de Burela.

Cada centro presentará un "cadro artístico" que levará incluídos códigos QR que nos dirixirán á actividade realizada por cada centro escolar.

A Exposición será na Sala de Usos Múltiples do Concello de Viveiro, durante a semana do 9 ao 13 de maio, en horario de 18:00 a 20:00 horas. Esta exposición tamén se poderá realizar noutros Concellos da Mariña.

 

Este é o noso cadro que representa un cardume de peixes. Os códigos Qr levarannos aos traballos realizados a través do Poxecto Documental Integrado: COÑECEMOS CELEIRO

A exposición contará cada día con diferentes Actividades Dinamizadoras:
    • Encontros con escritores recoñecidos.
    • Participación do Conservatorio de Música de Viveiro
    • Os centro educativos tamén serán protagonistas en cada xornada da exposición con diversas actuacións musicais, de representación, dramatización, lecturas, contacontos...

 

PROGRAMA DE ACTOS:

LUNS 09/05/2022
ACTO DE INAUGURACIÓN
18:00h
. Discurso inaugural.
. Faladoiro co xornalista, escritor e contador de historias, Pablo J. Rañales.
Presentará o seu libro “Siervos de tinta”, de Valhalla Ediciones.
. Actuación musical de Amigos do folk, grupo de gaitas do Conservatorio
Profesional de Música de Viveiro.

MARTES 10/05/2022
18:00h
. Actividade dinamizadora do CEIP de Covas:
- Representación "Non é unha caixa", a cargo do alumnado de 1° EP.

MÉRCORES 11/05/2022
18:00h
. Actividade dinamizadora do IES María Sarmiento de Viveiro:
- Presentación do Diario do Sarmiento (radio contra o acoso escolar) e
do podcast Las Grandiosas Tigresas Barbudas.

XOVES 12/05/2022
18:00h
. Actividade dinamizadora do CEP Lois Tobío de Viveiro:
- Contaconto “A biblioteca ten a palabra”, a cargo de Rebeca Palmeiro.
- Conto musicado “Nica, a canica”, a cargo do alumnado de 1o EP.

VENRES 13/05/2022
ACTO DE CLAUSURA
18:00h
. Discurso de clausura.
. Actividade dinamizadora do CEIP de Celeiro:
- Coral “A palabra feita música”.
. Actuación musical da Orquestra de guitarras do Conservatorio Profesional de
Música de Viveiro.
 

2/5/22

O MEU RECUNCHO FAVORITO DE CELEIRO

Seguimos a presentar máis traballos do PDI "Coñecemos Celeiro", nesta ocasión trátase do traballo realizado polo alumnado de 3º de Educación Primaria xunto co seu titor Ricardo González Blanco.

Cada un dos nenos e nenas de 3º elixiron o seu recuncho preferido de Celeiro, fotografárono e fixeron unha descrición do mesmo. 

O resultado podemos velo no seguinte vídeo. A música de fondo é unha canción composta por Daniel Fernández Caxete e cantado polo grupo coral "Sons de Celeiro".




30/4/22

ACTIVIDADE "MARES DE CULTURA"

 

Na mañá do venres, 29 de abril, os nenos e nenas de 5º e 6º de Primaria puideron desfrutar dun magnífico día de praia acompañados dun gran guía.

A través de Mares de Cultura recibiron unha charla na biblioteca do colexio sobre a fauna e a flora dos nosos ecosistemas mariños.

Posteriormente foron andando ata a praia de Area para facer un percorrido intermarieal e observar en directo e cn gran experto as especies mariñas da nosa contorna.

O resultado da actividade foi moi satisfactorio, de seguro que repetiremos!



29/4/22

MAQUETAS DO RELEVO

 A continuación, amosámosvos un vídeo sobre un proxecto de xerografía que elaboraron os nenos e nenas de 4º Ed. Primaria. 
Este traballo consistiu en elaborar unhas maquetas cos diferentes elementos do relevo.
O resultado foi un estupendo traballo por parte de cada un deles/as. 
Noraboa rapaces e rapazas!



28/4/22

CATRO VELLOS MARIÑEIROS

Seguimos traballando no noso PDI . Nesta ocasión, os nenos e nenas  de 4º de Ed. Infantil aprenderon unha versión da canción de "Catro vellos mariñeiros", elaboraron un precioso mural e realizaron un libriño do noso pobo.     






26/4/22

DÍA DO LIBRO -RECREAMOS PORTADAS-

 Este ano para celebrar o día do libro, propuxémosvos reproducir dun "xeito caseiro", a portada dun libro ou conto que vos gustara, tentando repetir esa portada. 

Para iso, podíades facer varias cousas:

- caracterizarvos das persoaxes 

- facer un debuxo aplicando diferentes técnicas

- ou facer un bookface.

Despois, tiñades que sacar unha foto e envíala ao email da nosa biblioteca.

Pois ben, o resultado foi o seguinte:

Fostes moitos os que participástedes e fixéchedes moi bos traballos!

Gracias por participar, seguro que vos divertíchedes moito recreándoas.  Encantáronos todas as portadas! 

Os nenos e nenas de Infantil agasallaron cun libro, expurgado da nosa biblioteca, ás familias.
PREME NA IMAXE

 

25/4/22

VISITA CELEIRO

Seguimos traballando no noso PDI "Coñecemos Celeiro" e agora presentámosvos o traballo elaborado polos nenos e nenas de 2º E.Primaria. 

Trátase dunha divertida guía turística que nos ensina todos os puntos de interese e actividades que podemos facer no noso pobo.

Aquí tedes un vídeo resumo da mesma:



22/4/22

UN CONTO CHEO DE LOBOS.

Celebramos o Día do Libro, e que mellor maneira que presentándovos a curta "UN CONTO CHEO DE LOBOS", unha adaptación do conto do mesmo nome da editorial OQO, elaborada polos nenos/as e mestres de 5º e 6º de Ed. Infantil.

Este é o produto final do proxecto "Nos tamén creamos!" no que os mestres Cristina e Dani, xunto co seu alumnado, estivo traballando durante todo o segundo trimestre. 

Este programa do Plan Proxecta, trata de propocionar o uso e valoración da lingua galega, por medio da creatividade e da incorporación das novas tecnoloxías da comunicación e información, ás aulas.

Durante a elaboración desta curta, pasaron por un longo proceso: elixiron o conto, de entre os que lles facilitaron OQO editores, fixeron a súa adaptación propia, elaboraron o guión gráfico ou story board, deseñaron e fabricaron escenarios e personaxes, aprenderon a animar coa técnica stop motion, gravaron e puxeron voz á curtametraxe que presentaron tamén ao concurso : Nos tamén creamos!

Un fantástico traballo que, de seguro vos vai encantar!!




21/4/22

TOUPI CIENCIA - A XANELA DO MAXÍN

 Hoxe tivemos a visita no noso centro da Toupiña e o seu axudante Protonio, que nos amosaron uns divertidos experimentos utilizando o método científico, promovendo a curiosidade e amosándonos a gran importancia que ten o facer preguntas para aprender e avanzar.

Espectáculo titulado TOUPICIENCIA, no que os nosos nenos e nenas pasaron un rato moi entretido e quen sabe... se algún deles/as.....hoxe, espertou o súa vocación científica!



6/4/22

Traballos do proxecto "Coñecemos Celeiro"

Este Proxecto Documental Integrado foi proposto para ser traballado no presente curso  co obxectivo principal de que todo o alumnado coñeza a localidade onde está situado o seu colexio pois moitos proceden doutras parroquias do Concello de Viveiro.

Hoxe en día é máis doado saber o que acontece noutros lugares do mundo que no noso pobo, pois a televisión, internet… ofrécennos moita información e así o noso cada vez se perde máis. Por iso, dende o CEIP de CELEIRO, queremos poñer en valor a localidade de Celeiro: unha vila que vive do mar, dos seus produtos e que ten a súa propia historia.

Hoxe presentamos dous traballos:

  • Catro vellos mariñeiros do alumnado de 1º curso de Primaria 
  • Presentación dos lugares máis emblemáticos de Celeiro a cargo do alumnado de 4º de Primaria.

Podemos ver todos os traballos realizados ata o momento na seguinte páxina 

(PREMER NA IMAXE)